يرحم روحك يا يحيي

Fatma El Kordy

بدل مننزل نهتف سوا روحت عزاك ! كده يا يحيي ؟! عارف انا الي زعلني اوي انا قريت كلمة المرحوم مكتوبة عالقاعة ....بس معلش انا عارفة انك في مكان احسن بكتييييير و مبسوط اويييي كمان :') هتوحشني يا يحيي مع السلامة يا صديقي الثائر المثقف الصغير ... الحمد لله الذي لا يحمد علي مكروه سواه ... اللهم أحسن خاتماتنا يا كريم يا الله .. اللهم أنس وحدتة و أمن روعتة و لقنه حجته يا كريم ...

انت مامتش صح ؟

بقالي 12 ساعه مستنياك ترد عليا..انت هترد عليا صح..يا يحيي بقي رد..ارجووك بقي
شفت النائب العام استقال يا يحيي ..خافوا مننا
لغوا الوقفه انا قعدت اقولهم ازاي تلغوا الوقفه اللي هقابل فيها يحيي..ماينفعش تلغوها
بس محدش عبرني..
 انا قولت لفاطمة اننا لازم نروح عشان انت مش بترد علينا ومتعرفش انها اتلغت
انا واثقه انك هتبقي هناك ..احنا اتفقنا مش كده ؟

تعالي يللا  نسهر نشتم في الشعب سوا..

انت فين ؟ ..اتاخرت ليه عليا انهارده ؟

عارف انت مموتش ليه ؟؟ عشان انت عايش جوانا يا صاحبى انت زرعت جوانا حاجات تخلينا منقدرش ننساك خليتنا نبص فى وشوش بعض نفتكرك الله يرحمك يا صاحبى و يجعل مثواك الجنة

يارب خليك حنين عليه.

يرحم روحك يا يحيي

يحيي ماات !!
يحيي مات ازاي
ده لسه من كام ساعه كنا بنتفق اننا هنروح مع بعض مسيرة وزارة الدفاع و عند دار القضاء .
كنا لسه بنشتم في الشعب و بنقول عليه عبيد
كان لسه بيقولي رأي باباه في اللي بيحصل
كنت لسه عماله ابعتله في اخبار وحشه
كنت لسه عماله اقلش عليه و هو مافهمش وافتكرني بتكلم جد
خلاص يا يحيي تعالي و اوعدك مش هفضل ابعتلك في اخبار وحشه كل شوية
ومش هغلس عليك تاني خالص..
يعني خلاص كده مش هينفع نسهر لحد البصح انا و انت نتكلم في السياسه و نشتم في الشعب تاني
يا يحيي ولا حتي مره كمان..
مره واحده كمان طيب ؟؟!!!


يحيي صاحبي من 17 سنه اعرفه من اولي حضانه
كان ديما صوت الحق
كان ديما احسن واعقل واحد فينا ..
يحيي مامتش ..يحيي هيفضل عايش فينا ..


يارب ثبته عند السؤال..خليه يا رب يجاوب زي ما كان بيجاوب في المدرسه ..يارب بقي

الطرف التالت

طبيعي جدا اني لما الاقي صفوت حجازي وعصام العريان وخالد عبدالله و الاخوان في طرف والجبش والشرطة والفلول في طرف .... يبقي انا الطرف التالت

سمية الطاهر

ما تدّخلوش بينّا خاين عشان نكتر*

انا منزلتش في حته ..ولا مشيت في مسيرة ولا رحت ميدان ..ولا شركت في اي احداث لغاية دلوقتي لسبب واحد اني ضد المؤيدين و ضد المعارضين

انا ضد اننا ننزل مع فلول واسفين ياريس وجيش وشرطه(شايله صور شهداء..ياتري كل واحد شايل صورة الشهيد اللي قتله ولا مش ضروري يعني ؟) و بقايا نظام ايديهم ملوثة بالدماء حتي لوعدونا واحد ولما يطردوا الناس من المسيرات عشان بتهتف ضد الداخلية و الجيش تبقي فين الثورة ؟!

ضد اننا ننزل مع الاسلامين بعونا وكانوا بيهتفوا الجيش والشعب ايد واحده والجيش بيقتل فينا وكانوا لحاسين بيادات والتخاذل الرهيب منهم ساعة الحكم العسكري

 وانا مش ضد الاخوان لا انا ضد الفساد و الظلم تحت اي مسمي يعني عسكر ,فلول ,دخلية ,مبارك ,طنطاوي ,قضاء ,اعلام ,اخوان وانا مش عايزة اشيل مرسي انا عايزة اشيل قاتل ايا كان مين عايزة مطالب الثورة تتحقق..

 الفرق اللي بنا وبنهم اننا بندافع عن قضية ومبادئ وهما بيأيدوا او بيعراضوا اشخاص !

الناس مش نازلة عشان فساد و ظلم ومطالب ثورة ماتحققتش (الا من رحم ربي) الناس يا نزله عشان بيكرهوا الاخوان ياما عشان مصالح و ركوب ع الثورة
و السؤال اليتيم اللي قاهرني كان فين الناس دي كلها من الطرفين كانوا فين ايام المجلس العسكري والمجازر اللي كان بيعملها كل شهر ؟تجزيئ المبادئ ده شئ حقير جدا بجد ..

وبدأتوا لحس بيادات من دلوقتي عشان هيخلصوكوا من الاخوان ؟...برافو
نسيتوا لما الجيش نزل كهرب الناس قدام مجلس الشعب ..نسيتوا كشوف العذرية ؟
نسيتوا اهالي الشهداء اللي اضربوا عند مسرح البالون ..نسيتوا المحاكمات العسكرية..برافو
نسيتوا عمرو البحيري و عصام عطا ؟
نسيتوا اعتصام 8.7 لما اتفض اول يوم رمضان ودخلوا المسجد بالبيادات وضربوا الناس؟
نسيتوا مينا دانيال لما دهسته المدرعة عند ماسبيرو ؟
نسيتوا علاء عبد الهادي و محمد مصطفي  والشيخ عماد في مجلس الوزراء..برافو
نسيتوا محمد محمود 1 و 2 ..نسيتوا احمد حراره و رضا ؟
نسيتوا اشهد يا محمد محمود كانز كلاب و كنا اسود ؟
نسيتوا شهداء الثورة؟
 آه صحيح مش دول إلي كانوا الشرطة قتلوهم و أخدوا براءة كلهم و متحكمش علي و لا واحد؟..طيببرافو عليكوا...نسيتوا كل حاجة عشان نشيل شوية كلاب من السلطة فنجيب كلاب زيهم..

 يسقط عسكر جيش داخلية...يسقط حكم الإخوانجية!!

الناس فرحانه ان الجيش طلع بيان وهيعمل انقلاب ..طيب
انا هفضل قاعده في البيت لحد رحيل مرسي وبعدين لما تخلصوا احتفالات وتروحوا بيتكوا
هنزل اهتف "يسقط يسقط حكم العسكر" و "الداخلية بلطجية"

(اتنين ملهمش امان العسكر والاخوان )..ولا نسيتوا دي كمان 

ثم دارت اللمونة

دورة كاملة......ثم داخت

ثم جه إخوانّا و لامونا

ثم ان الثورة باخت

ثم هما هما برضه

اللى باعوا الطول و عرضه

يصحوا يتخانقوا و يعارضوا

ثم إن الريحة فاحت

ثم مش نازلين معاكوا

ثم إن الجيش حمونا

... ثم قال حنزل لوحدى 

ثم دقن ف كل حتة

ثم يعمل مليونية

ثم يمشى الساعة ستة

ثم يعمل فيها عنتر

ثم ياخد علقة سخنة

ثم حيخزوقنا عسكر

ثم يطلع من نافوخنا

ثم دارت اللمونة 

دورة اكبر ...ثم دخنا

ثم فجأة الكل يتعب

ثم إن الجيش حيقتل

ثم إحنا حمارنا يغلب

ثم جيم الدومينو يقفل

ثم مصر عاوزة زقة

ثم ناس ما تقولش لأه

يركبوا ع الثورة تانى

ثم نخسر.....ثم نكسب

*مصطفي ابراهيم

يسقط كل من خان

يسقط كل من خانوا ..ويسقط كل من هانوا ..ويسقط كل من وقفوا فى وش جيل بيتحرر.. ويسقط كل من ضربوا ..ويسقط كل من قتلو.. ويسقط كل من شطبوا سطور فى تاريخ بيتسطر*

يسقط مبارك عسكر فلول داخلية... يسقط حكم الاخوانجية.

عاصم امام - سلمية

هباء منثورا

قولي ازاي اخاف علي صورتك في نظري لتتهز وانت اصلا مش خايف ؟
قولي ازاي اخاف اكتر منك عليك لتموت جوايا ؟
قولي ازاي..؟!

متلومنيش لو حصل و يوم كرهتك غصب عني ..صنع ايديك 

مزيد من التشرنق

رغبة ملحة في الانسحاب اكثر واكثر الي الداخل والاندماج في عوالم اخري..

عارف يعني إيه عاشق؟

فاكر يعني إيه مشتاق؟
يعني حضن واخد الكون في حضنه
ولسّه قادر
يشيل شوارع
وسط قلبه

‎سوزان عليوان‎

كل شي عم يخلص

والحب اللي فوق طاقة الحب ولابعد حدود الحب اخرته بتدمر الصحة و بتسبب الوفاة ..!

وجاء يسألني عـلى إستحياء إن كنتُ أذكره ؟
أجبتُ : وهل المبتور ينسى جزءاً منه فارقهُ ؟

مروة الإتربي

يرحم روحك م الوجع

عزيزتي رضوي..

يارب تبقي كويسه..انتي محاربة قديمه ايه اللي حصل ؟..
ماتستسلميش للوجع..ماتسيبهوش ياكل في روحك..
انا استسلمت ..قولت هنغمس في الوجع لغاية ما اتحرق واموت فاتولد من جديد..
ودلوقتي انا واقفه في النص زي اللي رقص ع السلم
وقفت في نص الوجع لا مني عرفت اموت ولا قاومته
كل يوم بحاله ..ومش بوصل لحاجه
علشان انا في الاصل ثابته في مكاني..في نص الوجع بالضبط

الوجع مابيمشيش يارضوي مش هكدب عليكي
الوجع مابيمشيش..
احنا بس اللي بنعتاده و بيبقي زي موسيقي حزينه لخلفية محايده لحياة عادية..
ساعات بفكر ان الاصل هو الوجع
احنا بس اللي لما بنفرح روحنا بتبقي شفافة فبيتوه الوجع عننا ..
او احنا لما بنفرح بيبقي علي عنينا غشاوه بمبي مبتخليناش نشوف الوجع و نشوف الحياة بمبي..

و اه الوجع هيطاردنا حتي لو هربنا لنص الكورة الارضية التاني
عشان الوجع في الاصل جوانا يا رضوي..
اعملي خطط و املي الايام
نزلي نفسك من البيت بالعافيه عشان تمرس الحساة
غلوشي علي الزعل بفيلم كرتون و حاجه حلوه
ساعتها ممكن تحسي انك انتصرتي عليه
بس هتلاقي حاجات صغيرة تحصل تفكرك
او حد هيوجهك و يبص في عينك و يقولك انتي مش كويسه
او تبصي في المرايا فتشوفي الوجع في عنيكي بيعوم..
فتتوجعي اكتر ..
او حتي لو عملتي زيي ورميتي كل اسلحتك
سيبتي كل حاجه بتتزحلق من ايدك تقع
وسيبتي كل المشاعر الوحشه تطفو ع السطح
هو نفس الوجع..
كورس مكثف..

اسمعي صوتك الجواني يا رضوي
وثقي فيه اووي واعرفي انه عمره ماهيكذب عليكي ابدا..
هو هيقولك تعملي ايه..

انا اوحش حد ممكن يقولك ازاي تتغلبي ع الوجع
عشان انا لسه بتوجع و بحاول ..

بس الوجع هيخلص يا رضوي هيخلص مع الوقت
مضطرين ناخد الجرعه كامله ..
عشان نتعلم ..عمرنا ما هنتعلم من غير وجع صح ؟
و اكيد اكيد هنتولد من جديد حتي لو اتولدنا بعد ميت سنه
البداية الجديدة تستاهل نصبر و نتحمل شوية وجع..

يرحم روحك يارضوي من الوجع
حضن كبير اووي..
تصبحي علي ملائكه..

ده رد علي رسالة الاستغاثة اللي رضوي كتبتها 

اشارة كونية كمان يارب

عايزة شوية وقت كمان وحدي..
جايز وقت الوجع خلص
جايز تهيأت مؤقته بالشفا
غالبا تهيأت مؤقته بالشفا
مش مهم
الوقت الاضافي اللي عايزاه للتامل
تامل الوجع و الدمار
الدمار نعمه
عشان هو الطريق الوحيد المقنع لتحويل مسار الحياة..
محتاجه موسيقي مش اغاني.. لا موسيقي
الموسيقي زي الالوان لازم ندقها نستطعمها نديها وقتها عشان تساعدنا نتصلح
محتاجه اقرب مني تاني لغاية ما ابقي زيي فابقي انا
محتاجه ابص جوايا واسألني ببساطه انتي عايزة ايه
و الاجابة تكون واحد اتنين تلاته
مش رغي كتير ولف و دوران ولف حولين اللف و دوران حولين الدوران ودوخه
واجابه مجعلصه بفيونكه ماطلعش منها بحاجه
ببساطه كده انا عايزة ايه ..؟
كمان محتاجه محتاجه جدا ارجع اعمل خطط
خطط كتير كتير اوي
و ليستات حاجات عايزة اعملها حاجات عايزة اجيبها..
محتاجه اكتب
اكتب ليا مش عليا
اكتب عشاني مش عني..
محتاجه هدوء داخلي
هرجع العب يوجا تاني
افضي دماغي اسكت صوتي الجواني..
واركز مع النفس
شهيق..زفير ..
بهدوء..
و ارجع ادعي تاني
"يارب يارب صلحلي قلبي وسعهولي لونهولي ابعتلي اشارة
اشارة بتلمع واضحه و صريحه و ايدني ثقة في صوتي الجواني خليني اصدقني اكتر
يارب خليني استعيد ايماني بالحب تاني بالحياة
يارب خلي روحي واسعه ..خليني ماصفه للناس اللي بحبهم
اصفيلهم حاياتهم من الحاجات الوحشه اخدها اخبيها في صندوقي الاسود و اسيبهلهم ملونه وبس
يارب خليني اعرف الاقي الطريق جوايا الاقي غرفه التامل بتاعتي اللي مفتاحها معايا بس مش لاقيه الباب
يارب خليني واسعه ..
يارب خليني واسعه..
يارب خليني واسعه ..واسعه اوي..
اسع الكون بالناس بالشوارع بالاغاني
اسع الكوكب كله في ضمه واحده وميت كوكب كمان اذا لزم الامر

بوست اتكتب وانا بتفرج علي "eat pray love" 

"يَقتلون الفراشات ، ماعادت تطير بين الأزقه المهجورة ـ لم تَعد تغني وقت الإحتراق ،، هي الآن تَنفضُ الغبار عن وحدتها ،،

تجدل ضفائر غُربتها ،، تتفقد أجنحتها وتزيلُ عن وجهها دمع البيلسان ."

#النصف المضيء من الباب الموارب

مــاتـزعلـيـــــش

مــاتـزعلـيـــــش

متزعليش لو يوم قالولك إنه مش باين عليه أثر الفراق

وإنه مش بيجيب في سيرتك وإنه عادي

لا بان عليه أثر الفراق ولا فيه ألم ولا فيه اشتياق

حجاش قصيده كتبها فيكي

هي دي اللي طلعتي بيها

أما هو خلاص نسيكي

عادته ولا هيشتريها

وإحنا قولنالك زمان مبتسمعيش

فمتزعليش..!

الجخ

عيد ميلادي البمبي النحس

انهارده فضلت اليوم كله في السرير ..و من بين خطط كتير عملتها عشان عيد ميلادي النحس..العامل المشترك الوحيد اللي بينها اني هبقي لوحدي فيها..فاخترت اسهل وحده
صحيت بدري فضلت اقاوم الصحيان...واحاول انام تاني.فشلت
اتفرجت علي كرتونات كتير و افلام كتير
مفيش حد في البيت وده سبب كمان يخليني ماضطرش اقوم امثل اني بمارس طقوس الحياه اليوميه...

وزي كل سنه في اليوم ده لازم حد يموت..!
صحيت انهارده علي ان واحد قريبنا صغنن خالص توفي
عنده عشر سنين كان عنده سرطان وبيقولو ربنا ريحه..

انا بكره اليوم ده..
بكره كيوم اربع
و كعيد ميلادي
و تخيل لما الاتنين يبقوا في نفس اليوم..

قافله موبيلي ..
حسيت اني جاحده بس فعلا فكره ان الناس تكلمني تعيد عليا دي حاجه محبطه مش ده التعبير الصح بس الاقرب ..
بتكتشف ساعتها قد ايه انت تعرف ناس كتير انا عارفه ان المفروض دي حاجه حلوه ..بس بتكشتف رغم كل ده قد ايه انت لوحدك..
كل سنه اليوم ده بيبقي اسوء من اللي قبله بطريقه تخض
كريم كلمني رغم كل ده هو مايعرفنيش اوي بس كان مهتم جدا انه يوصلي عشان يقولي كل سنه وانتي طيبه
اصر اني اتمني امنيه كنت بحاول اقنعه ان اليوم فضله ساعه ويخلص وانه مش مهم واني معنديش تورته
بس في الاخر خلاني اتمني امنيه ..و الشرط كان انها تبقي امنيه مش متعلقه بشخص ..و اتمنيت..
رضوي كمان كلمتني انا بحب رضوي اوي عشان هي من الناس الجميله اللي روحها شفافه ..
اليوم خلص باقل خساير ممكنه
خلص اخيرا ..هف
الوضع بائس تماما ..كل حاجه مكركبه جوايا وحوليا
عمله ضفيرتان وده يدل علي كم الاحباط الي انا فيه..لبسه فستان الزعل الاسود اللي وسع عليا اوي مأخرا و بقي شكله مش بتاعي..
كحل اسود كمان لزوم طقوس الزعل..ورقص في الضلمه علي اغنية "راح بكير " مع عياط مكتوم..

ربنا يرحمك يا صغنن.. انا معرفش اسمك ودي حاجه تزعل اكتر ...

بعضُ ذاكرة

هل لا زلت تريدُ أن تعرف ماذا أريدُ كهديةً؟!

أُريدُ ذاكرةً جديدةً تتماشى مع مشاعرك نحوي

أريدُها بيضاء، ورجاءً... لا تلوثها

جهاد نجيب

حبسي أنت

جرب اني انسي..بتسرق النسيان ..

بتنادني تاني ليه

ماأنتى خلاص حبيتى غيرى ..روحى للى حبتيه..
أنسى غدرك والآسيه ؟
ولا حبى اللى راح ضحيه؟
ولا الغريب اللى حبتيه عليا ولا الشوال اللى بدلتيه عليا..!

بتناديني تاني ليه بصوت دينا مسعود

صاروا شهرين