حبيبتك مش عارفه نفسها

 

مش هعرف ارسم حلمنا لوحدي
وانا ايدايا بترتعش عشان مش باخد ادويتي
ولا بفطر كل يوم الصبح ..

ساعدني..
حط ايدك علي ايدي
ونمشي علي نقط المنمنمه فتوضح الصورة
و يتحقق الحلم

مش هعرف اكتب نهاية مؤقته سعيدة لقصه انا مش متاكده اني بطلتها ..
ببساطه ..محتاجاك
محتجاك تطمني..
عشان لما افرح معاك افرح بجد
والخوف يبطل يصادر ابتسامتي..

ليه لما بحكيلك علي نوبات فزعي معاك
مابسمعش غير صدي صوتي ..!

لما الشتا يدق الببان

نصيحة عظيمه من صديق عزيز قاللي "بلاش يجي الشتا والزعل والاحباط موجودين..لازم تحاربي....
هو الشتا من غير حاجه بيجيب اكتئاب..
مش ناقصه!"

زحمة الحيطان

الكتابه ع الحيطه من صحابي والذكريات وتواريخ اعياد ميلاد وكلام اغاني وكلام سعيد

فرشات كتير والورد علي الباب والشباك صور ملزوقه لينا زمان

بصمه لينا ف كل شبر كل رسمه..كلمه..اغنية..صورة..

حاجات جميله ملونه وحجات مش جميله بس برده ملونه !

ومن سنه لما قررنا نمحي القديم ونحط نقطه ونبتدي من اول الحيطه

دهانات كتير الوان كتير ولوني العزيز مينفعش..فوشيا لا

يبقي روز والروز ده للسذجين والابرياء ..

انا مش بريئ انا شخبطة ..

مش انت قولت هنبتدي من جديد يبقي روزللبنات ..!

فضي وانقل وامسح ..

امسح كل بصمه لينا ف كل شبر

 غير مكان كل حاجه و لغبط النظام و اثبت عليه

فيبقي ده هو النظام الجديد..

و كل يوم قبل ما انام افضي دولابي كله علي السرير و انام و سط الهدوم ..عشان الدفا ..

ارمي كل حاجه ليا تهمني ف كل ركن فاضي في المكان

عايزة احس ان المكان ده يخصني فعلا بتاعي

و ماما تدخل تزعق لمي حاجتك المتنتوره مدفعتش فلوس انا عشان اعيش ف مزبله !

و الم الحاجات و بعد ما تطلع..قبل ما انام ارمي الهدوم ع السرير..عشان الدفا

اخد القرار بعد سنه ارجع النظام زي القديم نفس الترتيب نفس الاماكن

لكن وجعني قلبي ليلتها يوم مانمت ولقيت الحيطه قدامي فراغ

 من غير اسامي و شخبطه من غير اغاني

من غير رسايل موبايل و نمر تليفونات

 محفوظة و متغطية تحت الكذا طبقة دهان !

و انا..انا اللي متغطية بالهدوم ..ومفيش دفا ..!

الحم قلب !

ومتنساش تبقي تلحم تناتيف قلبك المتنتورة بمعلقة عسل قبل ما تنام وتغسل سنانك بعدها..!

ما هو ربك قال:" فِيهِ شِفَاءٌ لِلنَّاس"

اشارة كونية تافهه !

و زي دلوقتي السنه اللي فاتت
 لما ماجده الرومي بشرتني بحبك قبل حتي ماعرفك !!

اكتوبر المجيد 

اللي اتكسر يتصلح بالحب

انا مقتنعه جدا ان اللي اتكسر يتصلح لو كلنا هنستموت في المحاوله
لو لحمنا الشروخ ببوسه وحضن و مكعب سكر
وكلام حنين و طبطبه وحدوتة قبل النوم
الجرح هيدوب و يلتأم من جديد !

و الحلو اللي راح , يجي احلي منه لو احنا عايزين

الفكره في الاراده.

المشكله كل المشكله لما تكرر تصلح اللي اتكسر لوحدك

و عادتا اللي اتسبب في تعقيد الخيط ولعبكته غالبا ما بيكنش موجود يساعدك تفكه!

فكل ما تحاول تصلح تعور اديك وقلبك

ولما "ترمي جناح مكسور ميطرش" عشان انت مدوتوش بالحبمتلمش نفسك في حاجات مينفعش ترجعها لوحدك..!

انجازات صغيرة :)

 عارف لما يبقي نفسك في حاجه اوي ..

فتخاف تسيب نفسك تحلم بيها وفجأه كده تلقيها بتتحقق  :)

تدوينه "شبح محمد محود " هتتنشر في كتاب ال100 تدوينه

انجازات قد يظنها البعض صغير ..بس انا مبسوطه

رضوي ,رنيم ,سارة
 انا بحبكم يا بنات متزعلوش
انتوا اعظم من كده بكتير<3 font="font">

كأنما افئدتهم بشمعي مضاءة دون نقصان في حناني*

رغم كل الندوب الرماديه الابديه
لسه في طاقة نور غريبه طالعه من قلب الفراشة اللي في قلبي
لسه رغم كل شئ قادرة اسامح اوي
مسامحه واسعه و عميقه مفيهاش شوائب
فعلا بجد عايزة اساعدك تقوم و تكمل
عايزاك سعيد  !
رغم اني عارفه ان و انا بلم تناتيفك المتنتورة
عشان الصمها بضحكه و لمسه حنينه و ان امكن بوسه في القلب و مكعب سكر
اكيد هجرح اديا 

بس زي ماقولتلك اللي ايده "زي" قلبه هيدخل الجنه

انا عندي استعداد افضل ادي و ادي و ادي لابعد الحدود
مش مستنيه حاجه ..خالص
يكفيني فرحي بيا و انا لسه قدرة ادي رغم عمق الجراح اللي فيا
اللي في كل مره يحاول يلتام يداس عليه تاني

مش فارق معايا تحبني دلوقتي ..انا بحبك ديما
انا بس استريحت لما اقولت في وسط كلامك ان اللحظات اللي بتلمع بنا كانت بجد!
يكفيني ان اللي عشته كان شئ ابعد من السحر

انا مش همشي بصه ورايا بس يكفيني طعم الذكرة الحلو اللي لسه مادبش !
ومش هتعشم في اللي جاي ..انا راضيه مقدما

طلبت مني اساعدك تقف علي رجلك تاني ..
انا مستعده اكون مناعتك اللي هتحارب كل الميكروبات
بس اديني فرصتي احارب بدالك
حسستني بالمسؤليه ..بس مقولتليش اعمل ايه !
خايفه بعد ما الصمك تنتكس ..و ابقي انا السبب

اديني فرصتي ..اديك كل الاحاسيس الجميله
زي مكان لازم تديني فرصتي عشان احبك اووي و احميك 

مزق من حنانك *

بخيط أخير
بأبرة لا تخاف
احوك جسدك ثانية.

أرتق القلب اولا,
ثم اجمع
ما تبعثر منك
حولك ,
وحيث الفراغات التي احدثها اخرون
اقطع روحي
رقعا صغيرة .

سوزان عليوان *

اي نحس هذا

في لحظة تجلي اكتشف ان جميع حكاياتي يفسدها رجالي علي بامرأه اخري !

واكتشفت ان نساء رجالي الجدد اللاتي كسبنهن بعدي يكرهونني وربما كن يغرن مني في بدأ الحكاية ..ورغم ذلك هن يربحن !

هنيأن لكم رجالي الاوفياء ..احبابي سابقا !

و تبا لكم جميعا !

اشاره كونية

الصبح بدري و انا نازله التجديف
دعيت ربنا يبعتلي فرصه تانيه و وعدته اني هحاول باقصي ما عندي اني استغلهت
و طلبت اشارة كونيه وضحه و مضيئة

حارب عشاني

كنت متخيله زمان ان لما حد يحبك اووي 

هيحارب نفسه
والدنيا
 والكون
وقوي الطبيعة
والناس دي كلها

عشان بس يكون معاك.

كنت متخيله ان لما حد يحبك اووي
مش هيستحمل يشوفك زعلان
ومقهور
وهيحاول يخفف عنك!

كنت متخيله ان لما حد يحبك اووي
مش هيخليك تغيب عن عينه
و انا بس كان نفسي اوحشك !

كنت متخيله ان لما حد يحبك اووي
مش هيحاول ينساك
مش هيحب حد عشان ينساك

كنت متخيله ان لما حد يحبك اووي
هيتكلم عنك كويس حتي لو مش مع بعض !

كنت متخيله ان لما حد يحبك اووي
هينتهز كل الفرص المنمنمه عشان يشبع منك

بس اكتشفت ان لا اصلا مش شرط يعني!

فيونكات

عمرك جربت تركب عجله علي البحر واخر موجه تلمسك  ..
انا جربت كتتتتتير :))
فكراك الانهارده كتير..

فاكر يجي من 12 سنه لما كنت بتخدني وراك ع العجله و نروح ناكل ايس كريم من بعيد

اصلا احنا اتعرفنا علي بعض بالعجل ..كانت لحظة تاريخية علي فكرة بس احنا مخدناش بالنا..

طيب فاكر البوم عمر دياب علم قلبي لما اكتشفناه سوا ..و لما كنت بتنزل السلم كله بالعجله ..كنت بتبهرني ! 

وبننهي اليوم بقعده طويله تحت نشوف الشهب والنجوم ونراقب السما و نحكي ..فاكر؟ ..انا فاكره..كويس اووي اووي

فاكر لما عجلتي اتكسرت و نقلناها علي عجلتك و قضيت بقيت الصيف من غير عجله :') فات يجي 8 صيف من غيرك ..من غير عجل !

انت مش حقيقي دلوقتي عشان هتفضل بالنسبه لي الولد الصغير اللي بشعر اصفر شبه شعري ..
بيلعب معايا بالعجله و ياخدني وراه و يجبلي ايس كريم

مكنتش ابدا تفهم زعلي ومشكلي بس كانت ديما بتحاول تساعدني.وغالبا كانت بيفشل بس انا كنت بمبسط ان في حد معايا .... مكنتش لوحدي :')

وكالعاده..باخد من الحكايات بس البدايات السعيده وديما النهايات المفتوحه
وبتخطي كل الزعل والحزن والمشاكل وبنساه
واحتفظ بس باللحظات الملونه اللي بتلمع ..!

عيد..اي عيد !؟وين العيد مافي عيد

“العيد للأطفال يعنى بلونة ملونة ولبس جديد وعيديه فلوس كتيرة

والعيد للكبار حبيب حنين يقولك ليلة العيد " أنت عيدى ” *

شروط العيد مكنتش متوفرة عندي ..!

 محدش جبلي بلالين ..و مفيش حبيب يقولي كل سنه و احنا مع بعض ..!

العيد مكنش عيد و انا من جوايا وحيده ..

*منه علي

سنوات‏ ‏الارق‏ ‏التي‏ ‏لا‏ ‏تمر

كلما زحفت الي اعماق النوم اجدك تنتزعني منه و بقوة
لقد تعبت اريد النوم ..فالترحمني قليلا لعلي اغفو ..لعلي انساك مؤقتا !!

رمضان جميل

كل سنة واحنا كفنا رقيق وصغير

انجازات صغيرة :)

ورود و فراشات جنب جرافتي مينا دانيال 

#كل_سنه_وانت_طيب_يامينا ..   :)) ♥

فراشات و ورود فوشيا و موف و اصفر

 يمكن اعرف اواجه اشباح شارع محمد محمود ..

و امحي ذكريات ضد الحذف 

...و ارتاح :)

اول مره انزل ارسم
و اول مره ادخل ش محمد محمود من ساعه الاحداث !
انا كنت خايفه اوي

في مهب النسيان

صلي..ففي سجود قلبك نسيانه !*

‎*‫احلام‬‏المستغانمي
كل سنة وانتوا حلويين ياولاد..رمضان جميل

ارقدي بسلام يا صبارتي العزيزة

اصبحت كل شروق اجلس اشاهد صبارتي و هي تموت ..
ولا استطيع فعل شئ..!
 عندما اراه يوم الجمعه ساقول له ان الصبارة اللي جبتهالي من غير مناسبه
 ماتت من غير سبب 
 اقسم انني اعتنيت بها ..ولكن من الواضح انها لم تحبني
و واضح ايضا ان ليس البشر فقط من يتركوني

اصبحت متأكده ان مع كل شئ سيئ يحدث ان الله يعاقبني" لا اله الا انت سبحانك انى كنت من الظالمين "


“حاجات كتير 
فى حياتى اللى فاتت
راحت
بس لسه 
عندى امل فيها 
عشان كده 
الزرعه الميته
فى بلكونتى 
مع انها خلاص 
ماتت
يوماتى باسقيها ...” *
― خالد كساب  

فكرة يوم ما جبتهالي و فضلت اتنطط واقولك اد ايه انا مبسوطه و ان دي احلي كادو جاتلي ..
و انت قولتلي ان انا اوفر و كان ممكن اقولك "شكرا " و بس بدل كل التنطيط ده
شكرا يا صديقي الصغنون <3

 انا قررت انزل ادفنها في الجنينه جمب قبر بابسي (القطه بتاعتي) :( !

أبيض وأسود

محاولات للروقان هذا الصباح
نشر الغسيل وقت تغير الوان السما
مع الغنا بصوت عالي و العالم لسه نايم
قعاد ع الشباك بعد مخلص استمتع بالنور
هموت علي قهوة بس انا لسه منمتش
مبنمش وقت النوم و مبصحاش وقت الصحايان
ما هي دي الاجازة..!
مسامحه الناس كلها ع طول مش انهارده بس
اصلا انا مش بزعل غير زعل مؤقت مفتعل
متصلحه مع نفسي انهارده
بطلت الومني ..بطلت !


انا نسخه مني زمان بس ابيض واسود
ومش عارفه ارجع تاني بالالوان
شلالات الوان و قوس قزح
و دعوتي وسط الصلي يارب صلحني..يارب لصمني


فجاة مبقتش عارفه اكتب
حاسه ان كل الكلام اتقال
يمكن عشان كل الاحاسيس متجربه ..حتي الاحساس ده !
اعتقد اني ادتني وقتي في الحزن و التوهان و التفكير بكفايه


بعمل حاجات كتيرة جديده ..لوحدي !
و بروح اماكن لاول مره ..بالغصب مني و التشجيع
بس بعد كده بتبسط مني
جه الوقت اللي ابطل ابص في علي خسارتي
المفروض ابص جوايا
انا من جوه عامله زي اوضتي دلوقتي
مفيش حاجه في مكنها.
نفسي انام و اصحي الاقي ماما تكفلت بترتيب كل حاجه
جوه وبره
و نومي ميبقاش بس فصل بين يوم و التاني
لكن كمان فصل بين حياه قديمه مبهدلة وحياة ملونة
و نبدأ من جديد ..

وأعدك

أعرفُ أنني كحبيبة -يا قلبي- مُملة كشريطٍ لاصق، ولا ألومُ فيك التوقف عن الاهتمام صدقًا

وأعدك...
.

سأتوقف عن تتبعك كالمراهقات،سأفتعلُ النضج قليلًا والتضحية

سألملم بقاياي في حقيبة سفر وأطيرُ يحملني الشوق إليك في عكسِ الاتجاه، وأبتعد

جهاد نجيب